في التقرير التالي نشرح كل الخطوات والاجابات من اول سحب كراسة الشروط من البريد حتى استلام الشقة اعلان 18 سكن لكل المصريين (5).
الاعلان نزل بشكل رسمي تقدروا تجهزوا الاوراق المطلوبة بداية تاريخ الاعلان 26 – 11 – 2024 وينتهي في 24 – 12 – 2024 .
إجراءات وشروط حجز وحدة سكنية في سكن لكل المصريين
1- سحب كراسة الشروط ب٣٠٠ جنيه + 355 جنيه مصاريف ادارية لا ترد + جدية الحجز 30 ألف جنيه بالنسبة للتسليم خلال 36 شهر
2 – بعد ذلك تدفع للشقة مساحة ٩٠ متر جدية حجز من 20 ألف جنيه محافظات مثل المنوفية والعاشر من رمضان الشرقية وهكذا ، وهذه الوحدات تكون وحدات سابقة تسليم فوري
في اكتوبر الجديدة تسليم فوري نفس الكلام
3 – الوحدات تسليم خلال 36 شهر المقدم 30 الف جنيه
4 – يتم تجهيز الأوراق ورفعها على الموقع الإلكتروني ، وبعد شهر من غلق الموقع من التقدم تظهر النتيجة من 3 الي 6 اشهر
تنبيه مهم جدا
في ناس بتشتري كراسة الشروط وبعد كده بترجع في قرارها وتقول مش هتقدم وأنها هتبيع الكراسة لأي حد وبسعر اقل ، نصيحة اوعي تشتري منه نهائي ولو حتي ببلاش .
علشان الكراسات بتتسجل علي السيستم بإسم ورقم البطاقة ورقم موبايل صاحبها ، يعني لو اشترتها من حد خارج مكتب البريد اسمك مش هيكون متسجل علي السيستم وكده ربنا يعوض عليك
تنبيه تاني مهم
ماينفعش تسحب كراسة الشروط وانت خارج البلاد لأن لو بعد كده تم طلب شهادة تحركات سيتم رفض الملف.
ولو انت داخل البلد بس مفيش وقت تروح تسحب الكراسة بنفسك وهتبعت حد لازم يكون معاه اصل بطاقة الرقم القومى الخاصة بصاحب الطلب.
تنبيه مهم تالت
لابد من تواجد صاحب الطلب وقت سحب كراسة الشروط من البريد بالبطاقة الشخصية
طيب لو مش فاضى اعمل اية ؟
ممكن اى حد يروح يسحب لك كراسة الشروط لكن لازم يكون معاه اصل البطاقة الشخصية
تنبيه مهم رابع
قبل ما تشتري كراسة الشروط لازم رقم الموبايل بتاعك اللى هتسجله في البريد وفي كراسة الشروط وعلي الموقع الإلكتروني يكون بأسمك لانه الوسيلة الوحيدة للتواصل معك من الاستعلام والبنك علشان الرقم لو مش باسمك وضاع او اتوقف وحبيت تغيره هتسوح و تتعطل مدة طويلة لحد ما يتم تغيير الرقم على السيستم.
طيب لو كل الشروط اللي فاتت منطبقة هنعمل ايه؟
لو منطبق هتبدأ دفع أقساط ربع سنوية لمدة ٣٦ شهر
يعنى ٦ الاف جنيه كل ٣ شهور لمدة ٣٦ شهر يعني الاجمالي ٧٢ الف جنيه.
بعد الـ ٣ سنين ينزلك استعلام من صندوق الإسكان الاجتماعي علشان يتأكد من الاوراق اللى تم تقديمها وقت نزول الاعلان او لتبليغه باى مستجدات مثل تغيير الوظيفة او السكن او تغيير الحالة الاجتماعية مع تجهيز المستندات الدالة على ذلك.
بعد كدا تتحول علي البنك اللي هيمول الشقة
بعد كدا البنك بيعمل عليك دراسة ائتمانية علشان يحدد يحدد المقدم والقسط الشهرى ، ودول بيختلفو من شخص للتاني ومن بنك للتاني وبيتحسب على حسب السن والدخل الشهرى والوظيفة و فترة التمويل
لو بعد التقديم ورفع المستندات وظهرت النتيجة منطبق بس يكون المستندات اللى تم تقديمها على الموقع مظبوطة 100% يبقي تطمن ليك شقة وهتستلمها على حسب ترتيب الاولوية، حتى لو اتاخرت بس هتبقي ضامن اولويتك.
لو وقت التقديم كنت شغال قطاع خاص ومرتبك فوق الحد الأقصى – الاعزب او المتزوج- وعملت ناصح وعملت شهادة دخل من محاسب قانونى علشان تظبط دخلك ، للاسف هتتكشف وقت الاستعلام ، لان المستعلم هيطلب منك اثبات دخل حديث مثبت فيه مدة عملك فى الوظيفة وطبعا هيطلع انك مزاول للمهنة قبل نزول الاعلان و هيطلب منك اثبات دخل بتاريخ التقديم وهيطلع اعلى من الحد الاقصى وقت التقديم ، وطبعا هيبقي كدا فيه تضارب بيانات وهيتم استبعادك ، وناس فى اعلانات سابقة تم استبعادها بسبب زيادة الدخل وقت التقديم ب١٠ جنيه بس.
فـي حالـة سـبق الحجـز بإحـدى مشـروعات الإسـكان الاجتماعـي دون التخصيـص والاسـتفادة ، هنا يشـترط تقديـم مسـتند يفيـد سـحب مقـدم جديـة الحجـز بالإعـالان السـابق.
خلي بالك
لو عندك ارباح او حوافز لابد من ذكرها فى إثبات الدخل.
كلمة صافى الدخل لا تكفى.
لازم تذكر الدخل الشهرى او السنوى + الارباح الشهرية او السنوية + الحوافز الشهرية او السنوية.
طيب لو شغال فى محل او سوبر ماركت او اى مكان تجارى تعمل ايه؟
الافضل هنا تعمل اثبات دخل ومدير المكان يمضى ويختمه لك ختم المحل وختم السجل التجارى ، بلاش من عند محاسب قانونى.
لان الاعمال الحرة اللى بتحتاج شهادة دخل من محاسب قانونى بتبقى اعمال حرة بدون مكان ثابت يعني الأعمال الحرفية
طيب لو إيصال المرافق مش باسمي ايه الحل؟
مش شرط ايصال المرافق يبقي باسم المتقدم ، المهم يكون نفس عقد الشقة اللى هيتم تقديمه.
طيب لو إيصال المرافق الكترونية تعمل ايه؟
لو كل الإيصالات الكترونية زى ايصالات فورى هتروح تدفع فى شركة الكهرباء مثلا وتطلب ايصال مختوم مذكور فية عنوان السكن الحالي .
مهم جدا
مش مسموح تقديم الزوج والزوجة غير مرة واحدة فقط لان الزوج والزوجة ذمة مالية واحدة وليهم استفادة مرة واحدة فقط من مشاريع الدولة .
طيب لو اتنين او تلاتة اخوات ينفع يقدموا مع بعض في نفس الاعلان؟
ايوة مسموح للاخوات حتى لو ٥ أخوات انهم يقدمو فى اى اعلان لشقق الاسكان الاجتماعى حتى انهم ممكن يقدموا فى نفس الاعلان لان الاخوات كل واحد ليه ذمة مالية منفصلة عن التاني ، اهم حاجة يكونوا فوق ٢١ سنة ويكون لكل واحد دخل ثابت.
طب لو طالب فوق الـ٢١ سنة وعايز يقدم ومفيش وظيفة يقدم ازاى ؟
هيعمل شهادة دخل من محاسب قانونى معتمد بوظيفة اعمال حرة .
بس خلي بالك لازم لازم ذكر انك مزاول للمهنة اكتر من سنة على الاقل وتكتب دخلك اقل من المذكور فى كراسة الشروط مع اخذ صورة كارنية المحاسب وشهادة مزاولة مهنة للمحاسب وتكون سارية .
سؤال مهم .. لو مرتبى زاد بعد التقديم هيتم استبعادى ؟
لا طبعا ، لان العبرة هنا بالقبول والرفض بالنسبة للدخل وقت التقديم
كدة وصلنا لاهم مرحلة .. الملف بيمر بعدة مراحل
١ – الاستعلام الميداني من الصندوق بعد مرور فترة الأقساط الربع سنوية.
٢- الاستعلام البنكي في المنزل والعمل من البنك.
٣- الدراسة الائتمانية – داخل البنك الممول- لمعرفة حالتك الائتمانية وقدرتك علي سداد الأقساط وده بيفرق حسب القطاع – خاص أو عام او حر- والسن وفترة التمويل.
٤ـ مرحلة تخصيص الوحدة وده بعد موافقة البنك علي الدراسة الائتمانية وابلاغك للعرض وموافقتك عليه.
٥- عمل التوكيل بالوحدة لـ البنك وتوقيع العقود.
٦- استلام العقد خلال من ٣ الي ٦ شهور.
٧- تقديم الملف للجهاز – صورة العقد وبطاقات الرقم القومي وقسيمة الزواج- بعد استلام العقد واستلام محاضر الاستلام.
٨- التعاقد علي المرافق و امضاء محضر الاستلام واستلام الشقة.
كدا اقدر اقولك الف مليون مبروك مفتاح شقتك فى جيبك.
